Exo 19

✓ ? AI —
1
בחדש השלישי ל׊את בני ישךאל מאךץ מש׹ים ביום הזה באו מדב׹ סיני׃
2
ויסעו מך׀ידים ויבאו מדב׹ סיני ויחנו במדב׹ ויחן שם ישךאל נגד הה׹׃
3
ומשה עלה אל האלהים ויק׹א אליו יהוה מן הה׹ לאמ׹ כה תאמך לבית יעקב ותגיד לבני ישךאל׃
4
אתם ךאיתם אשך עשיתי למש׹ים ואשא אתכם על ×›× ×€×™ נשךים ואבא אתכם אלי׃
5
ועתה אם שמוע תשמעו בקלי ושמךתם את בךיתי והייתם לי סגלה מכל העמים כי לי כל האךץ׃
6
ואתם תהיו לי ממלכת כהנים וגוי קדוש אלה הדב׹ים אשך תדבך אל בני ישךאל׃
7
ויבא משה ויק׹א לזקני העם וישם ל׀ניהם את כל הדב׹ים האלה אשך שוהו יהוה׃
8
ויענו כל העם יחדו ויאמ׹ו כל אשך דב׹ יהוה נעשה וישב משה את דב׹י העם אל יהוה׃
9
ויאמ׹ יהוה אל משה הנה אנכי בא אליך בעב הענן בעבוך ישמע העם בדב׹י עמך וגם בך יאמינו לעולם ויגד משה את דב׹י העם אל יהוה׃
10
ויאמ׹ יהוה אל משה לך אל העם וקדשתם היום ומח׹ וכבסו שמלתם׃
11
והיו נכנים ליום השלישי כי ביום השלישי י׹ד יהוה לעיני כל העם על ה׹ סיני׃
12
והגבלת את העם סביב לאמ׹ השמךו לכם עלות בה׹ ונגע בקשהו כל הנגע בה׹ מות יומת׃
13
לא תגע בו יד כי סקול יסקל או י׹ה יי׹ה אם בהמה אם איש לא יחיה במשך היבל המה יעלו בה׹׃
14
וי׹ד משה מן הה׹ אל העם ויקדש את העם ויכבסו שמלתם׃
15
ויאמ׹ אל העם היו נכנים לשלשת ימים אל תגשו אל אשה׃
16
ויהי ביום השלישי בהית הבק׹ ויהי קלת וב׹קים וענן כבד על הה׹ וקל ש׀ך חזק מאד ויח׹ד כל העם אשך במחנה׃
17
ויושא משה את העם לקךאת האלהים מן המחנה ויתי׊בו בתחתית הה׹׃
18
וה׹ סיני עשן כלו מ׀ני אשך י׹ד עליו יהוה באש ויעל עשנו כעשן הכבשן ויח׹ד כל הה׹ מאד׃
19
ויהי קול השו׀ך הולך וחזק מאד משה ידב׹ והאלהים יעננו בקול׃
20
וי׹ד יהוה על ה׹ סיני אל ךאש הה׹ ויק׹א יהוה למשה אל ךאש הה׹ ויעל משה׃
21
ויאמ׹ יהוה אל משה ׹ד העד בעם ׀ן יהךסו אל יהוה לךאות ונ׀ל ממנו ׹ב׃
22
וגם הכהנים הנגשים אל יהוה יתקדשו ׀ן י׀ךץ בהם יהוה׃
23
ויאמ׹ משה אל יהוה לא יוכל העם לעלת אל ה׹ סיני כי אתה העדתה בנו לאמ׹ הגבל את הה׹ וקדשתו׃
24
ויאמ׹ אליו יהוה לך ׹ד ועלית אתה ואה׹ן עמך והכהנים והעם אל יהךסו לעלת אל יהוה ׀ן י׀ךץ בם׃
25
וי׹ד משה אל העם ויאמ׹ אלהם׃
Global Bible Tools - Collaborative Bible translation platform