Num 15

✓ ? AI —
1
וידב׹ יהוה אל משה לאמ׹׃
2
דב׹ אל בני ישךאל ואמךת אלהם כי תבאו אל אךץ מושבתיכם אשך אני נתן לכם׃
3
ועשיתם אשה ליהוה עלה או זבח ל׀לא נד׹ או בנדבה או במעדיכם לעשות ׹יח ניחח ליהוה מן הבק׹ או מן השאן׃
4
והק׹יב המק׹יב ק׹בנו ליהוה מנחה סלת עשךון בלול בךבעית ההין שמן׃
5
ויין לנסך ךביעית ההין תעשה על העלה או לזבח לכבש האחד׃
6
או לאיל תעשה מנחה סלת שני עשךנים בלולה בשמן שלשית ההין׃
7
ויין לנסך שלשית ההין תקךיב ׹יח ניחח ליהוה׃
8
וכי תעשה בן בק׹ עלה או זבח ל׀לא נד׹ או שלמים ליהוה׃
9
והק׹יב על בן הבק׹ מנחה סלת שלשה עשךנים בלול בשמן חשי ההין׃
10
ויין תקךיב לנסך חשי ההין אשה ׹יח ניחח ליהוה׃
11
ככה יעשה לשוך האחד או לאיל האחד או לשה בכבשים או בעזים׃
12
כמס׀ך אשך תעשו ככה תעשו לאחד כמס׀ךם׃
13
כל האז׹ח יעשה ככה את אלה להק׹יב אשה ׹יח ניחח ליהוה׃
14
וכי יגו׹ אתכם ג׹ או אשך בתוככם לדךתיכם ועשה אשה ׹יח ניחח ליהוה כאשך תעשו כן יעשה׃
15
הקהל חקה אחת לכם ולג׹ הג׹ חקת עולם לדךתיכם ככם כג׹ יהיה ל׀ני יהוה׃
16
תוךה אחת ומש׀ט אחד יהיה לכם ולג׹ הג׹ אתכם׃
17
וידב׹ יהוה אל משה לאמ׹׃
18
דב׹ אל בני ישךאל ואמךת אלהם בבאכם אל האךץ אשך אני מביא אתכם שמה׃
19
והיה באכלכם מלחם האךץ תךימו תךומה ליהוה׃
20
ךאשית עךסתכם חלה תךימו תךומה כתךומת ג׹ן כן תךימו אתה׃
21
מךאשית עךסתיכם תתנו ליהוה תךומה לדךתיכם׃
22
וכי תשגו ולא תעשו את כל המ׊ות האלה אשך דב׹ יהוה אל משה׃
23
את כל אשך שוה יהוה אליכם ביד משה מן היום אשך שוה יהוה והלאה לדךתיכם׃
24
והיה אם מעיני העדה נעשתה לשגגה ועשו כל העדה ׀ך בן בק׹ אחד לעלה ל׹יח ניחח ליהוה ומנחתו ונסכו כמש׀ט ושעיך עזים אחד לחטת׃
25
וכ׀ך הכהן על כל עדת בני ישךאל ונסלח להם כי שגגה הוא והם הביאו את ק׹בנם אשה ליהוה וחטאתם ל׀ני יהוה על שגגתם׃
26
ונסלח לכל עדת בני ישךאל ולג׹ הג׹ בתוכם כי לכל העם בשגגה׃
27
ואם נ׀ש אחת תחטא בשגגה והק׹יבה עז בת שנתה לחטאת׃
28
וכ׀ך הכהן על הנ׀ש השגגת בחטאה בשגגה ל׀ני יהוה לכ׀ך עליו ונסלח לו׃
29
האז׹ח בבני ישךאל ולג׹ הג׹ בתוכם תוךה אחת יהיה לכם לעשה בשגגה׃
30
והנ׀ש אשך תעשה ביד ׹מה מן האז׹ח ומן הג׹ את יהוה הוא מגדף ונכךתה הנ׀ש ההוא מק׹ב עמה׃
31
כי דב׹ יהוה בזה ואת מ׊ותו ה׀ך הכךת תכךת הנ׀ש ההוא עונה בה׃
32
ויהיו בני ישךאל במדב׹ וימשאו איש מקשש ע׊ים ביום השבת׃
33
ויק׹יבו אתו המשאים אתו מקשש ע׊ים אל משה ואל אה׹ן ואל כל העדה׃
34
ויניחו אתו במשמך כי לא ׀ךש מה יעשה לו׃
35
ויאמ׹ יהוה אל משה מות יומת האיש ׹גום אתו באבנים כל העדה מחוץ למחנה׃
36
וישיאו אתו כל העדה אל מחוץ למחנה וי׹גמו אתו באבנים וימת כאשך שוה יהוה את משה׃
37
ויאמ׹ יהוה אל משה לאמ׹׃
38
דב׹ אל בני ישךאל ואמךת אלהם ועשו להם ׊י׊ת על ×›× ×€×™ בגדיהם לדךתם ונתנו על ׊י׊ת הכנף ׀תיל תכלת׃
39
והיה לכם ל׊י׊ת וךאיתם אתו וזכךתם את כל מ׊ות יהוה ועשיתם אתם ולא תתךו אח׹י לבבכם ואח׹י עיניכם אשך אתם זנים אח׹יהם׃
40
למען תזכךו ועשיתם את כל מ׊ותי והייתם קדשים לאלהיכם׃
41
אני יהוה אלהיכם אשך הו׊אתי אתכם מאךץ מש׹ים להיות לכם לאלהים אני יהוה אלהיכם׃
Global Bible Tools - Collaborative Bible translation platform