Num 26

✓ ? AI —
1
ויהי אח׹י המג׀ה ויאמ׹ יהוה אל משה ואל אלעזך בן אה׹ן הכהן לאמ׹׃
2
שאו את ךאש כל עדת בני ישךאל מבן עשךים שנה ומעלה לבית אבתם כל ישא שבא בישךאל׃
3
וידב׹ משה ואלעזך הכהן אתם בעךבת מואב על י׹דן י׹חו לאמ׹׃
4
מבן עשךים שנה ומעלה כאשך שוה יהוה את משה ובני ישךאל הישאים מאךץ מש׹ים׃
5
׹אובן בכו׹ ישךאל בני ׹אובן חנוך מש׀חת החנכי ל׀לוא מש׀חת ה׀לאי׃
6
לחש׹ן מש׀חת החש׹וני לכ׹מי מש׀חת הכ׹מי׃
7
אלה מש׀חת ה׹אובני ויהיו ׀קדיהם שלשה ואךבעים אלף ושבע מאות ושלשים׃
8
ובני ׀לוא אליאב׃
9
ובני אליאב נמואל ודתן ואבי׹ם הוא דתן ואבי׹ם ק׹ואי העדה אשך השו על משה ועל אה׹ן בעדת ק׹ח בה׊תם על יהוה׃
10
ות׀תח האךץ את ×€×™×” ותבלע אתם ואת ק׹ח במות העדה באכל האש את חמשים ומאתים איש ויהיו לנס׃
11
ובני ק׹ח לא מתו׃
12
בני שמעון למש׀חתם לנמואל מש׀חת הנמואלי לימין מש׀חת הימיני ליכין מש׀חת היכיני׃
13
לז׹ח מש׀חת הז׹חי לשאול מש׀חת השאולי׃
14
אלה מש׀חת השמעני שנים ועשךים אלף ומאתים׃
15
בני גד למש׀חתם ל׊׀ון מש׀חת ה׊׀וני לחגי מש׀חת החגי לשוני מש׀חת השוני׃
16
לאזני מש׀חת האזני לעךי מש׀חת העךי׃
17
לא׹וד מש׀חת הא׹ודי לא׹אלי מש׀חת הא׹אלי׃
18
אלה מש׀חת בני גד ל׀קדיהם אךבעים אלף וחמש מאות׃
19
בני יהודה עך ואונן וימת עך ואונן באךץ כנען׃
20
ויהיו בני יהודה למש׀חתם לשלה מש׀חת השלני ל׀ךץ מש׀חת ה׀ך׊י לז׹ח מש׀חת הז׹חי׃
21
ויהיו בני ׀ךץ לחש׹ן מש׀חת החש׹ני לחמול מש׀חת החמולי׃
22
אלה מש׀חת יהודה ל׀קדיהם ששה ושבעים אלף וחמש מאות׃
23
בני יששכך למש׀חתם תולע מש׀חת התולעי ל׀וה מש׀חת ה׀וני׃
24
לישוב מש׀חת הישובי לשמךן מש׀חת השמךני׃
25
אלה מש׀חת יששכך ל׀קדיהם אךבעה וששים אלף ושלש מאות׃
26
בני זבולן למש׀חתם לסךד מש׀חת הסךדי לאלון מש׀חת האלני ליחלאל מש׀חת היחלאלי׃
27
אלה מש׀חת הזבולני ל׀קדיהם ששים אלף וחמש מאות׃
28
בני יוסף למש׀חתם מנשה וא׀ךים׃
29
בני מנשה למכי׹ מש׀חת המכי׹י ומכי׹ הוליד את גלעד לגלעד מש׀חת הגלעדי׃
30
אלה בני גלעד איעזך מש׀חת האיעזךי לחלק מש׀חת החלקי׃
31
ואשךיאל מש׀חת האשךאלי ושכם מש׀חת השכמי׃
32
ושמידע מש׀חת השמידעי וח׀ך מש׀חת הח׀ךי׃
33
ו׊ל׀חד בן ח׀ך לא היו לו בנים כי אם בנות ושם בנות ׊ל׀חד מחלה ונעה חגלה מלכה ותך׊ה׃
34
אלה מש׀חת מנשה ו׀קדיהם שנים וחמשים אלף ושבע מאות׃
35
אלה בני א׀ךים למש׀חתם לשותלח מש׀חת השתלחי לבכ׹ מש׀חת הבכ׹י לתחן מש׀חת התחני׃
36
ואלה בני שותלח לעךן מש׀חת העךני׃
37
אלה מש׀חת בני א׀ךים ל׀קדיהם שנים ושלשים אלף וחמש מאות אלה בני יוסף למש׀חתם׃
38
בני בנימן למש׀חתם לבלע מש׀חת הבלעי לאשבל מש׀חת האשבלי לאחי׹ם מש׀חת האחי׹מי׃
39
לש׀ו׀ם מש׀חת השו׀מי לחו׀ם מש׀חת החו׀מי׃
40
ויהיו בני בלע א׹ד ונעמן מש׀חת הא׹די לנעמן מש׀חת הנעמי׃
41
אלה בני בנימן למש׀חתם ו׀קדיהם חמשה ואךבעים אלף ושש מאות׃
42
אלה בני דן למש׀חתם לשוחם מש׀חת השוחמי אלה מש׀חת דן למש׀חתם׃
43
כל מש׀חת השוחמי ל׀קדיהם אךבעה וששים אלף ואךבע מאות׃
44
בני אשך למש׀חתם לימנה מש׀חת הימנה לישוי מש׀חת הישוי לבךיעה מש׀חת הבךיעי׃
45
לבני בךיעה לחב׹ מש׀חת החב׹י למלכיאל מש׀חת המלכיאלי׃
46
ושם בת אשך שךח׃
47
אלה מש׀חת בני אשך ל׀קדיהם שלשה וחמשים אלף ואךבע מאות׃
48
בני נ׀תלי למש׀חתם ליחשאל מש׀חת היחשאלי לגוני מש׀חת הגוני׃
49
ליש׹ מש׀חת היש׹י לשלם מש׀חת השלמי׃
50
אלה מש׀חת נ׀תלי למש׀חתם ו׀קדיהם חמשה ואךבעים אלף ואךבע מאות׃
51
אלה ׀קודי בני ישךאל שש מאות אלף ואלף שבע מאות ושלשים׃
52
וידב׹ יהוה אל משה לאמ׹׃
53
לאלה תחלק האךץ בנחלה במס׀ך שמות׃
54
ל׹ב תךבה נחלתו ולמעט תמעיט נחלתו איש ל׀י ׀קדיו יתן נחלתו׃
55
אך בגו׹ל יחלק את האךץ לשמות מטות אבתם ינחלו׃
56
על ×€×™ הגו׹ל תחלק נחלתו בין ׹ב למעט׃
57
ואלה ׀קודי הלוי למש׀חתם לגךשון מש׀חת הגךשני לקהת מש׀חת הקהתי למ׹׹י מש׀חת המ׹׹י׃
58
אלה מש׀חת לוי מש׀חת הלבני מש׀חת החב׹ני מש׀חת המחלי מש׀חת המושי מש׀חת הק׹חי וקהת הולד את עמךם׃
59
ושם אשת עמךם יוכבד בת לוי אשך ילדה אתה ללוי במש׹ים ותלד לעמךם את אה׹ן ואת משה ואת מ׹ים אחתם׃
60
ויולד לאה׹ן את נדב ואת אביהוא את אלעזך ואת איתמך׃
61
וימת נדב ואביהוא בהק׹יבם אש ז׹ה ל׀ני יהוה׃
62
ויהיו ׀קדיהם שלשה ועשךים אלף כל זכ׹ מבן חדש ומעלה כי לא הת׀קדו בתוך בני ישךאל כי לא נתן להם נחלה בתוך בני ישךאל׃
63
אלה ׀קודי משה ואלעזך הכהן אשך ׀קדו את בני ישךאל בעךבת מואב על י׹דן י׹חו׃
64
ובאלה לא היה איש מ׀קודי משה ואה׹ן הכהן אשך ׀קדו את בני ישךאל במדב׹ סיני׃
65
כי אמך יהוה להם מות ימתו במדב׹ ולא נותך מהם איש כי אם כלב בן ×™×€× ×” ויהושע בן נון׃
Global Bible Tools - Collaborative Bible translation platform