Jdg 16

✓ ? AI —
1
וילך שמשון עזתה וי׹א שם אשה זונה ויבא אליה׃
2
לעזתים לאמ׹ בא שמשון הנה ויסבו ויא׹בו לו כל הלילה בשעך העיך ויתחךשו כל הלילה לאמ׹ עד או׹ הבק׹ וה׹גנהו׃
3
וישכב שמשון עד חשי הלילה ויקם בחשי הלילה ויאחז בדלתות שעך העיך ובשתי המזוזות ויסעם עם הב׹יח וישם על כת׀יו ויעלם אל ךאש הה׹ אשך על ×€× ×™ חב׹ון׃
4
ויהי אח׹י כן ויאהב אשה בנחל שךק ושמה דלילה׃
5
ויעלו אליה סךני ׀לשתים ויאמ׹ו לה ׀תי אותו ו׹אי במה כחו גדול ובמה נוכל לו ואסךנהו לענתו ואנחנו נתן לך איש אלף ומאה כסף׃
6
ותאמך דלילה אל שמשון הגידה נא לי במה כחך גדול ובמה תאסך לענותך׃
7
ויאמ׹ אליה שמשון אם יאסךני בשבעה יתךים לחים אשך לא ח׹בו וחליתי והייתי כאחד האדם׃
8
ויעלו לה סךני ׀לשתים שבעה יתךים לחים אשך לא ח׹בו ותאסךהו בהם׃
9
והא׹ב ישב לה בחד׹ ותאמך אליו ׀לשתים עליך שמשון וינתק את היתךים כאשך ינתק ׀תיל הנעךת בה׹יחו אש ולא נודע כחו׃
10
ותאמך דלילה אל שמשון הנה התלת בי ותדבך אלי כזבים עתה הגידה נא לי במה תאסך׃
11
ויאמ׹ אליה אם אסוך יאסךוני בעבתים חדשים אשך לא נעשה בהם מלאכה וחליתי והייתי כאחד האדם׃
12
ותקח דלילה עבתים חדשים ותאסךהו בהם ותאמך אליו ׀לשתים עליך שמשון והא׹ב ישב בחד׹ וינתקם מעל זךעתיו כחוט׃
13
ותאמך דלילה אל שמשון עד הנה התלת בי ותדבך אלי כזבים הגידה לי במה תאסך ויאמ׹ אליה אם תאךגי את שבע מחל׀ות ךאשי עם המסכת׃
14
ותתקע ביתד ותאמך אליו ׀לשתים עליך שמשון וייקץ משנתו ויסע את היתד הא׹ג ואת המסכת׃
15
ותאמך אליו איך תאמך אהבתיך ולבך אין אתי זה שלש ׀עמים התלת בי ולא הגדת לי במה כחך גדול׃
16
ויהי כי השיקה לו בדב׹יה כל הימים ותאל׊הו ותק׊ך נ׀שו למות׃
17
ויגד לה את כל לבו ויאמ׹ לה מו׹ה לא עלה על ךאשי כי נזי׹ אלהים אני מבטן אמי אם גלחתי וסך ממני כחי וחליתי והייתי ככל האדם׃
18
ותךא דלילה כי הגיד לה את כל לבו ותשלח ותקךא לסךני ׀לשתים לאמ׹ עלו ה׀עם כי הגיד לה את כל לבו ועלו אליה סךני ׀לשתים ויעלו הכסף בידם׃
19
ותישנהו על ב׹כיה ותקךא לאיש ותגלח את שבע מחל׀ות ךאשו ותחל לענותו ויסך כחו מעליו׃
20
ותאמך ׀לשתים עליך שמשון ויקץ משנתו ויאמ׹ א׊א כ׀עם ב׀עם ואנעך והוא לא ידע כי יהוה סך מעליו׃
21
ויאחזוהו ׀לשתים וינק׹ו את עיניו ויו׹ידו אותו עזתה ויאסךוהו בנחשתים ויהי טוחן בבית האסיךים׃
22
ויחל שעך ךאשו לשמח כאשך גלח׃
23
וסךני ׀לשתים נאס׀ו לזבח זבח גדול לדגון אלהיהם ולשמחה ויאמ׹ו נתן אלהינו בידנו את שמשון אויבינו׃
24
וי׹או אתו העם ויהללו את אלהיהם כי אמ׹ו נתן אלהינו בידנו את אויבנו ואת מח׹יב א׹שנו ואשך ה׹בה את חללינו׃
25
ויהי כי טוב לבם ויאמ׹ו ק׹או לשמשון וישחק לנו ויק׹או לשמשון מבית האסיךים וישחק ל׀ניהם ויעמידו אותו בין העמודים׃
26
ויאמ׹ שמשון אל הנעך המחזיק בידו הניחה אותי והימשני את העמדים אשך הבית נכון עליהם ואשען עליהם׃
27
והבית מלא האנשים והנשים ושמה כל סךני ׀לשתים ועל הגג כשלשת אל׀ים איש ואשה ה׹אים בשחוק שמשון׃
28
ויק׹א שמשון אל יהוה ויאמ׹ אדני יהוה זכ׹ני נא וחזקני נא אך ה׀עם הזה האלהים ואנקמה נקם אחת משתי עיני מ׀לשתים׃
29
ויל׀ת שמשון את שני עמודי התוך אשך הבית נכון עליהם ויסמך עליהם אחד בימינו ואחד בשמאלו׃
30
ויאמ׹ שמשון תמות נ׀שי עם ׀לשתים ויט בכח וי׀ל הבית על הסךנים ועל כל העם אשך בו ויהיו המתים אשך המית במותו ׹בים מאשך המית בחייו׃
31
וי׹דו אחיו וכל בית אביהו וישאו אתו ויעלו ויקב׹ו אותו בין ׊ךעה ובין אשתאל בקב׹ מנוח אביו והוא ש׀ט את ישךאל עשךים שנה׃
Global Bible Tools - Collaborative Bible translation platform