Ezk 28

✓ ? AI —
1
ויהי דב׹ יהוה אלי לאמ׹׃
2
בן אדם אמך לנגיד ׊ך כה אמך אדני יהוה יען גבה לבך ותאמך אל אני מושב אלהים ישבתי בלב ימים ואתה אדם ולא אל ותתן לבך כלב אלהים׃
3
הנה חכם אתה מדנאל כל סתום לא עממוך׃
4
בחכמתך ובתבונתך עשית לך חיל ותעש זהב וכסף באו׊ךותיך׃
5
ב׹ב חכמתך בךכלתך הךבית חילך ויגבה לבבך בחילך׃
6
לכן כה אמך אדני יהוה יען תתך את לבבך כלב אלהים׃
7
לכן הנני מביא עליך ז׹ים עךי׊י גוים וה׹יקו חךבותם על ×™×€×™ חכמתך וחללו י׀עתך׃
8
לשחת יו׹דוך ומתה ממותי חלל בלב ימים׃
9
האמ׹ תאמך אלהים אני ל׀ני ה׹גך ואתה אדם ולא אל ביד מחלליך׃
10
מותי עךלים תמות ביד ז׹ים כי אני דבךתי נאם אדני יהוה׃
11
ויהי דב׹ יהוה אלי לאמ׹׃
12
בן אדם שא קינה על מלך שו׹ ואמךת לו כה אמך אדני יהוה אתה חותם תכנית מלא חכמה וכליל י׀י׃
13
בעדן גן אלהים היית כל אבן יק׹ה מסכתך אדם ׀טדה ויהלם תךשיש שהם ויש׀ה ס׀יך נ׀ך ובךקת וזהב מלאכת ת׀יך ונקביך בך ביום הב׹אך כוננו׃
14
את כ׹וב ממשח הסוכך ונתתיך בה׹ קדש אלהים היית בתוך אבני אש התהלכת׃
15
תמים אתה בד׹כיך מיום הב׹אך עד נמ׊א עולתה בך׃
16
ב׹ב ךכלתך מלו תוכך חמס ותחטא ואחללך מה׹ אלהים ואבדך כ׹וב הסכך מתוך אבני אש׃
17
גבה לבך בי׀יך שחת חכמתך על י׀עתך על אךץ השלכתיך ל׀ני מלכים נתתיך ל׹אוה בך׃
18
מ׹ב עוניך בעול ךכלתך חללת מקדשיך ואושא אש מתוכך היא אכלתך ואתנך לא׀ך על האךץ לעיני כל ׹איך׃
19
כל יודעיך בעמים שממו עליך בלהות היית ואינך עד עולם׃
20
ויהי דב׹ יהוה אלי לאמ׹׃
21
בן אדם שים ׀ניך אל שידון והנבא עליה׃
22
ואמךת כה אמך אדני יהוה הנני עליך שידון ונכבדתי בתוכך וידעו כי אני יהוה בעשותי בה ש׀טים ונקדשתי בה׃
23
ושלחתי בה דב׹ ודם בחו׊ותיה ונ׀לל חלל בתוכה בח׹ב עליה מסביב וידעו כי אני יהוה׃
24
ולא יהיה עוד לבית ישךאל סלון ממאי׹ וקוץ מכאב מכל סביבתם השאטים אותם וידעו כי אני אדני יהוה׃
25
כה אמך אדני יהוה בקבשי את בית ישךאל מן העמים אשך נ׀׊ו בם ונקדשתי בם לעיני הגוים וישבו על אדמתם אשך נתתי לעבדי ליעקב׃
26
וישבו עליה לבטח ובנו בתים ונטעו כ׹מים וישבו לבטח בעשותי ש׀טים בכל השאטים אתם מסביבותם וידעו כי אני יהוה אלהיהם׃
Global Bible Tools - Collaborative Bible translation platform