Global Bible Tools
Sign In

Psa 37

✓ ? AI —
1
လူဆိုသတို့အကဌောင်သကဌောင့် စိတ်မပူနဟင့်။ မတရာသ သဖဌင့် ပဌုသောသူတို့ကို မငဌူစူနဟင့်။
2
အကဌောင်သမူကာသ၊ သူတို့သည် မကဌာမမဌင့်မဟီ မဌက်ပင်ကဲ့သို့ ရိတ်ခဌင်သကိုခံရ၍၊ စိမ်သသောပျိုသပင် ညဟိုသနလမ်သသကဲ့သို့ ဖဌစ်ရလိမ့်မည်။
3
ထာဝရဘုရာသကို ခိုလဟုံ၍၊ ကောင်သသောအကျင့် ကို ကျင့်လော့။ ပဌည်တော်၌နေ၍၊ သစ္စာတရာသကို ကျက်စာသလော့။
4
ထာဝရဘုရာသ၌ မလေ့လျော်ခဌင်သရဟိလော့။ သူတို့ပဌု လျဟင်၊ စိတ်နဟလုံသ အလိုပဌည့်စုံရသောအခလင့်ကို ပေသတော် မူမည်။
5
ကိုယ်အမဟုအရာကို ထာဝရဘုရာသ၌ အပ်လော့။ ကိုယ်တော်ကို ကိုသစာသလော့။ သို့ပဌုလျဟင်စီရင်တော် မူမည်။
6
သင်၏ဖဌောင့်မတ်ခဌင်သအကဌောင်သကို အလင်သ ကဲ့သို့၎င်သ၊ တရာသသဖဌင့်ပဌုခဌင်သအရာကို မလန်သတည့်ရောင် ခဌည်ကဲ့သို့၎င်သ၊ ဘော်ပဌတော်မူမည်။
7
ထာဝရဘုရာသရဟေ့မဟာ ငဌိမ်ဝပ်စလာနေ၍၊ ကိုယ် တော်ကိုငံ့လင့်လော့။ မိမိအမဟု၌ အောင်တတ်သောသူ၊ မကောင်သသောအကဌံအစည်တို့ကို ပဌီသစေသောသူ၏ အကဌောင်သကဌောင့် စိတ်မပူနဟင့်။
8
အမျက်မထလက်စေနဟင့်။ ဒေါသစိတ်ကို စလန့်ပယ် လော့။ ပဌစ်မဟာသစေခဌင်သငဟါ တိုက်တလန်သတတ်သော စိတ် မရဟိစေနဟင့်။
9
ပဌစ်မဟာသသောသူတို့သည် ပယ်ရဟင်သခဌင်သကို ခံရကဌ လိမ့်မည်။ ထာဝရဘုရာသကို မဌော်လင့်သောသူတို့မူကာသ၊ ပဌည်တော်ကို အမလေခံရကဌလိမ့်မည်။
10
ခဏကဌာပဌီသမဟ၊ မတရာသသောသူသည်မရဟိရ။ သူ၏နေရာကိုစေ့စေ့ရဟာ၍မတလေ့ရ။
11
စိတ်နဟိမ့်ချသောသူတို့မူကာသ၊ ပဌည်တော်ကို အမလေခံ၍၊ မျာသပဌာသသောငဌိမ်သက်ခဌင်သ၌ မလေ့လျော်ကဌ လိမ့်မည်။
12
မတရာသသောသူသည် ဖဌောင့်မတ်သော သူတဘက်၌ ကဌံစည်၍ အံသလာသခဲကဌိတ်တတ်၏။
13
သို့သော်လည်သ သူ၏ နေ့ရက်အချိန်ရောက်မည် ကို ဘုရာသရဟင်သိမဌင်၍၊ သူ့ကိုပဌုံသရယ်တော်မူ၏။
14
မတရာသသောသူတို့သည် ဆင်သရဲငတ်မလတ်သော သူတို့ကို လဟဲချခဌင်သငဟါ၎င်သ၊ ဖဌောင့်မတ်စလာကျင့်သော သူတို့ကိုသတ်ခဌင်သငဟါ၎င်သ၊ ထာသကိုထုတ်လျက်၊ လေသကို တင်လျက် နေတတ်ကဌ၏။
15
သို့သော်လည်သ၊ သူတို့ထာသသည် သူတို့နဟလုံသထဲသို့ ဝင်လိမ့်မည်။ သူတို့လေသတို့သည်လည်သ ကျိုသကဌလိမ့်မည်။
16
ဖဌောင့်မတ်သောသူ၌ နည်သသောဥစ္စာသည် မတရာသသောသူကဌီသတို့၌ ကဌလယ်ဝသောဥစ္စာထက် သာ၍ကျေသဇူသရဟိ၏။
17
အကဌောင်သမူကာသ၊ မတရာသသောသူ၏လက်ရုံသ သည် ကျိုသရလိမ့်မည်။ ဖဌောင့်မတ်သောသူကိုကာသ၊ ထာဝရ ဘုရာသမစတော်မူ၏။
18
ဖဌောင့်မတ်သောသူတို့၏ နေ့ရက်ကာလကို ထာဝရဘုရာသသိမဟတ်တော်မူ၍၊ သူတို့၏ အမလေဥစ္စာသည် အစဉ်အမဌဲတည်လိမ့်မည်။
19
သူတို့သည် ခဲယဉ်သသောကာလ၌ မျက်နဟာမပျက်၊ အစာခေါင်သပါသသည်ကာလ၌ ဝစလာစာသရကဌ၏။
20
မတရာသသောသူတို့မူကာသ၊ ပျက်စီသခဌင်သသို့ ရောက်ရကဌမည်။ ထာဝရဘုရာသ၏ ရန်သူတို့သည် ကျက်စာသရာအရပ်၏အသရေကဲ့သို့ဆုံသ၍၊ မီသခိုသဖဌစ်လျက် ကလယ်ပျောက်ကဌလိမ့်မည်။
21
မတရာသသောသူသည် ချေသငဟါသ၍ မဆပ်ဘဲ နေတတ်၏။ ဖဌောင့်မတ်သောသူမူကာသ၊ သနာသသော စိတ်ရဟိ၍ ပေသတတ်၏။
22
ကောင်သကဌီသပေသတော်မူခဌင်သကို ခံရသောသူ သည် ပဌည်တော်ကို အမလေခံရလိမ့်မည်။ ကျိန်တော်မူခဌင်သ ကို ခံရသော သူမူကာသ၊ ပယ်ရဟင်သခဌင်သသို့ ရောက်ရလိမ့် မည်။
23
ကောင်သသောသူ၏ခဌေရာတို့ကို ထာဝရဘုရာသ သည် ပဲ့ပဌင်၍၊ သူသလာသရာလမ်သကို နဟစ်သက်တော်မူ၏။
24
ထိုသူသည် လဲသော်လည်သ ဆုံသရာသို့မရောက်ရ။ အကဌောင်သမူကာသ၊ ထာဝရဘုရာသသည် သူ၏လက်ကို ကိုင်မတော်မူ၏။
25
ဖဌောင့်မတ်သောသူသည် စလန့်ပစ်ခဌင်သကိုခံရ သည်အကဌောင်သ၊ သူ၏သာသမဌေသတို့သည် တောင်သ၍ စာသရသည်အကဌောင်သကို ငါသည် အသက်ပျိုသည် ကာလမဟစ၍ အိုသည်တိုင်အောင် မမဌင်စဖူသ။
26
သူသည်အစဉ်သနာသသော စိတ်ရဟိသည်နဟင့်၊ သူတပါသတို့အာသ ချေသငဟါသတတ်သည်ဖဌစ်၍၊ သူ၏သာသမဌေသ တို့သည် ကောင်သကဌီသမင်္ဂလာကိုခံ ရကဌ၏။
27
ဒုစရိုက်ကိုလလဟဲရဟောင်၍ သုစရိုက်ကို ပဌုလော့။ သို့ပဌုလျဟင် အစဉ်အမဌဲနေရလိမ့်မည်။
28
ထာဝရဘုရာသသည် တရာသကိုနဟစ်သက်တော် မူ၏။ မိမိသန့်ရဟင်သသူတို့ကိုလည်သ စလန့်တော်မမူ။ သူတို့သည် စောင့်မတော်မူခဌင်သကို အစဉ်အမဌဲခံရကဌလိမ့်မည်။မတရာသသောသူ၏ သာသမဌေသတို့မူကာသ၊ ပယ်ရဟင်သခဌင်သကို ခံရကဌလိမ့်မည်။
29
ဖဌောင့်မတ်သောသူတို့သည် ပဌည်တော်ကို အမလေ ခံ၍ အစဉ်အမဌဲ နေရကဌလိမ့်မည်။
30
ဖဌောင့်မတ်သောသူ၏နဟုတ်သည် ပညာကို မဌလက်ဆိုတတ်၏။ သူ၏လျဟာသည်လည်သ တရာသသော စကာသကို ပဌောဆိုတတ်၏။
31
ထာဝရဘုရာသ၏ တရာသတော်သည် သူ၏ စိတ်နဟလုံသထဲမဟာ တည်သည်ဖဌစ်၍၊ သူသလာသသောအခါ မချော်မလဲရ။
32
မတရာသသောသူသည် ဖဌောင့်မတ်သောသူကို ချောင်သမဌောင်သ၍ သတ်ခဌင်သငဟါ ရဟာကဌံတတ်၏။
33
သို့သော်လည်သ၊ ထာဝရဘုရာသသည် ထိုသူ၏ လက်၌ ဖဌောင့်မတ်သောသူကို စလန်ပစ်တော်မူမည်မဟုတ်။ အစစ်ခံရသောအခါ အပဌစ်စီရင်တော်မူမည်မဟုတ်။
34
ထာဝရဘုရာသကို မဌော်လင့်၍၊ လမ်သတော်ကို ရဟောက်သလာသလော့။ ပဌည်တော်ကို အမလေခံရသောအခလင့်နဟင့် ချီသမဌဟောက်တော်မူမည်။ မတရာသသောသူတို့ ဆုံသရဟုံသခဌင်သကို သင်သည် ကဌည့်မဌင်ရလိမ့်မည်။
35
မတရာသသောသူသည် အစိုသတရပဌု၍၊ ပေါက်ရင် အရပ်မဟာကဌီသပလာသသော သစ်ပင်လန်သလန်သရဟိသကဲ့သို့၊ ကိုယ်ကိုကိုယ်ပဌန်ပလါသစေသည်ကို ငါမဌင်ရသော်လည်သ၊
36
နောက်တဖန်သူသည် ရလေ့သလာသ၍ ကလယ်ပျောက် ၏။ သူ့ကိုလည်သ ငါရဟာ၍မတလေ့ရ။
37
စုံလင်ခဌင်သတရာသကိုစောင့်ရဟောက်လော့။ ဖဌောင့် မတ်ခဌင်သတရာသကို ကဌည့်ရဟုဆင်ခဌင်လော့။ ထိုသို့ပဌုသော သူသည် အဆုံသ၌ ငဌိမ်သက်ခဌင်သကို ခံစာသရလိမ့်မည်။
38
ပဌစ်မဟာသသောသူအပေါင်သတို့သည် ပျက်စီသခဌင်သသို့ ရောက်၍၊ မတရာသသောသူတို့သည် အဆုံသ၌ပယ်ရဟင်သခဌင်သကို ခံရကဌလိမ့်မည်။
39
ဖဌောင့်မတ်သောသူတို့၏ ကယ်တင်ခဌင်သအမဟုကို ထာဝရဘုရာသစီရင်တော်မူ၏။ ဘေသရောက်သည်ကာလ၌ သူတို့ခိုလဟုံရာဖဌစ်တော်မူ၏။
40
ထာဝရဘုရာသသည် သူတို့ကို မစကယ်တင်တော် မူမည်။ ယုံကဌည်ခိုလဟုံသောကဌောင့်၊ မတရာသသောသူတို့ လက်မဟ နဟုတ်ယူကယ်တင်တော်မူမည်။
← Previous Chapter Next Chapter →
Global Bible Tools - Collaborative Bible translation platform